Drenthe

Veurof 
1. Bestuur 
2. Wonen warken en leren 
3. Landbouw, natuur, milieu en energie 
4. Verkeer en vervoer 
5. Cultuur, kunst, media en sport 
6. Zörg en welzijn 
7. In 't kort

Bij alles is de SP de partij die kek naor de drei dinger die ze het allerbelangriekste vindt: menselijke weerdigheid, geliekweerdigheid van elkenien en solidariteit tussen mèensen.

Dat is ok de basis van dit verkiezingspregram.
Wij vindt het belangriek dat de inwoners van Drenthe heur stem heuren laoten kunt. En die stem moet ze niet allén heuren laoten kunnen bij verkiezings of in belangenverienings, maor ok deur midddel van inspreken in staotenvergaoderings en referendums.
Onkreukbaorheid van bestuurders is het allerbelangriekste veur een goed bestuur. Daorum moet bestuurders onofhankelijk weden. De commissaoris van de keuningin en de gedippeteerden mugt daorum gien betaolde bijbaonties hebben. De (bij)baonties van volksvertegenwoordigers moet openbaor weden.

De provincie mot der de kommende jaoren alles an doen um bestaonde warkgelegenheid te holden en der neie bij te kriegen. Dat kan deur het investeringsprogram publieke warken, maor ok deur het helpen en anpitjern van het MKB (de grootste warkgever van Drenthe). Wij moet hierbij in ’t biezunder acht geven op mèensen met een handicap of een chronische ziekte.

Drenthe mot dudelk maoken dat het een grune provincie is en dan moew niet allén denken an recreatie en toerisme. Landbouw en natuurbeheer kuj wat de SP angiet niet lös van mekaor zien. Landbouw mot zo dier- en milieuvrundelijk meugelijk weden. Megastallen past daor niet in.
Wat oes angiet komt er gien kernofval of CO2 in de Drentse bodem. Het opslaon van CO2 kost 25% extra an fosssiele brandstof. Het is net of de energiebedrieven de CO2-opslag gebroekt as smoesie um extra kolencentrales bouwen te kunnen. Het is hetzölfde as waoter naor de zee draogen.

Um de darpen leefbaor te holden vin wij het belangriek dat der genog veurzienings bint, zoas pinautomaoten, schoelen, zörg en veilige fietsroutes. Maor ok goed openbaor vervoer dat geregeld en vaok genog red, mot der weden. De marktwarking in het openbaor vervoer vin wij een slechte zaok. Wij wilt niet dat der keuzes maokt wordt op basis van de pries; dat mot gebeuren vanwege de kwaliteit, genog buslienen, verneiing en vaok genog rieden. Nog beter is een provinciaol busbedrief.
Ondanks de jaorenlange subsidieverstrekking deur de provincie hef het vliegveld in Eel nog nooit winst maokt. Wat oes angiet wordt de subsidie stopzet en mot het vliegveld de eigen boks opholden.

Drenthe is riek an historie, cultuur en taol. De SP vindt daw daor zunig op weden moet en het under de andacht van het pebliek brengen moet. Bij het bezuuk an cultuur mot de zul niet hoog liggen, under andern deur bezukers körting te geven. Der mot ok ruumte weden veur festivals. Drenthe warkt met an (topsport)evenementen, maor stopt daor niet al te veul geld in.

De SP is der niet gerust op dat het allemaol goed giet in de zörg. Zeker in Drenthe komt aal meer oldern. An de iene kaant hej dan meer zörg neudig, maor an de aandere kaant wordt het tekört an warkers in de zörg aal groter. In Drenthe moet daorum meer opleidingen en opleidingsplaotsen kommen. De provincie let scharp op de oetvoering van de WMO. Wij bint erveur dat der mobiele zörgbureaus met consultaotsiebureaus veur oldern en jongern komt. Wij wilt dat der meer plekken in de jeugdzörg komt, dat jongelu en heur pap en mam niet meer wachten huuft as ze hulp neudig bint. Wieder mot de provincie beter letten op de kwaliteit van de jeugdzörg.