Drenthe

Veurof 
1. Bestuur 
2. Wonen warken en leren 
3. Landbouw, natuur, milieu en energie 
4. Verkeer en vervoer 
5. Cultuur, kunst, media en sport 
6. Zörg en welzijn 
7. In 't kort

De overheid mot oes allemaol bescharmen, maor dat niet allén. Hie is der ok veur um elkenien een betere toekomst te geven en dat is niet allén een taok veur volksvertegenwoordigers. Elkenien mot zuch betrökken vulen bij de democratie; um met te doen met de verkiezings, um in te spreken, um ideeën an te draogen, um inlichtings te kriegen, um met te beslissen deur middel van referendums. Körtum, der mot een open en eerlijk bestuur weden.

De SP is het er dus niet met iens dat de provincie allén maor kieken mot naor een paar grote belangenorganisaotsies

BELANGRIEKE DINGER VEUR DE SP OVER BESTUUR EN ORGANISAOTSIE:

• Een onkreukbaor bestuur. Gedippeteerden moet altied de waorheid zeggen en belangrieke informaotsie an de staoten weten laoten. Um der zeker van te weden dat ze onofhankelijk bint, mugt de commissaoris van de keuningin en de gedippeteerden der gien betaolde baonties naost hebben.

• De SP zöt dat het SNN* lang niet genog controleerd wordt. Beslissings moet op provinciaol niveau nummen worden. Noordelijke saomenwarking is best, maor ien noordelijk landsdiel hef meer nao- as veurdielen. Ok as der dinger op regionaol gebied oetvoerd wordt, mot de volksvertegenwoordiging rechtstreeks controleren. Zo heurt dat in een democratie.

• De provinciaole organisaotsie is doelmaotig. De provincie mot zölf de neudige kennis hebbben um provinciaole taoken oetvoeren te kunnen. Metwarkers moet verschillende taoken kriegen; zo kriew een flexibele organisaotsie.

• Gedippeteerde Staoten moet Provinciaole Staoten helder en klaor vertellen wat het beleid is dat ze doet en doen wilt. De oetdrukking dat PS ‘opofstand besturen mot’, wil allén maor zeggen dat Provinciaole Staoten niet in pietluttigheden verzoepen mag; het wil niet zeggen dat Provinciaole Staoten boetenspel zet worden mag.

• Wij wilt gien schrikbaorend hoge belonings(externe inhuur), maor ok gien inholdloze baonties rond of under het minimumloon.

• De provincie hanteert de Balkenende-norm, zörgt derveur dat subsidies te controleren bint en giet ambtenarij tegen.

• Het totaole tal an fte’s* veur Gedippeteerde Staoten mag niet meer as 4 weden..

• Wij bint veur referendums en heurzittings en wilt dat de provincie meer wark maakt van dizze vörms van directe inspraak.

• Provinciaole Staoten en kemmissies vergaodert as ’t maor ienigszins kan in ’t openbaor. Der moet wal slim goeie redens weden veur een besleuten vergaodering en die wil wij allén maor as der eerst in ’t openbaor over proot is.

• De provincie giet gebroek maken van open-bronsoftware.

* SNN: Samenwerkingsverband Noord Nederland. 
* fte: full time functie